Kumnyhadala obucacile ukuba unento yokwenza nezepolitiko kuba bezikho zonke iinkokeli zikazwelonke zasesipoliseni kunye nabaphathiswa, umphathiswa wamapolisa uNathi Nhleko uye wanikezela ngesikhululo esinamavili samapolisa eSite C, eKhayelitsha.
Bekukho usekela-mphathiswa wamapolisa uMaggie Sotyu, olibambela khomishinali wamapolisa kuzwelonke uKhomotso Phahlane, ophethe ibutho leHawks uMthandazo Ntlemeza, u Israel Kgamanyane olibambela kwibutho eliphanda amapolisa i(IPID), ikhomishinali yephondo, uKhombinkosi Jula nabanye abaphezulu emapoliseni kuquka namalungu epalamente.
Bekucacile ukuba olu tyelelo lunento yokwenza nezopolitiko nolonyulo loomasipala oluzayo. Ikhomishini yophando yase Khayelitsha eyayiphanda ukungasebenzi kakuhle kwamapolisa yafumanisa ukuba kukho ukungalingani koovimba kwiindawo ezihlelekileyo ezifana neKhayelitsha nakwiindawo ezihlala abantu abanemali.
Ngexesha esenza intentho yakhe, usekela-mphathiswa uMaggie Sotyu uthe baza kuzisa iizikhululo zamapolisa ezinamavili ezithandathu kweli phondo leNtshona Koloni kulo nyaka-mali sikuwo. Oka Sotyu uthi landile inani labantu abahlala kula ngingqi oko ke kunyanzelisa kubekho isikhululo samapolisa kula ngingqi.Uthi bakwinkqubo yokukhangela indawo elungele ukwakha isikhululo esisigxina kodwa oko kuyakuthatha ixesha elide nanjengoko ziliqela izinto ezilungiswayo.
Uthi isikhululo samapolisa kwingingqi yaseMakhaza siya kwakhiwa ngonyaka ka 2018. Kulapho usihlalo weqonga lophuhliso lweKhayelitsha uMnu Ndithini Tyhido athe kufike ixesha ukuba isebe lesipolisa liqwalasele ukuba alinakube libeka isikhululo esinamavili kusini na eMakhaza.Loo kaTyhido uthe bayayivuyela into yokuba iSite C ifumene esi sikhululo kuba ulwaphulo mthetho luxhaphakile. Ukwathe kukhona umntu ekufuneka ephundule ngolwaphulo mthetho olugquba kwingingqi yaseTaiwan ingengawo amapolisa.
Umphathi wamapolisa kwindibanisela yezikhululo zaseKhayelitsha uMajor General Brandt uthe uyabulela kwicandelo lesipolisa ngesi sikhululo kwaye uyakuqinisekisa ukuba sisebenza ngendlela eyiyo.
Ukanti umbutho olwelwa ubulungisa luthe Social Justice Coalition (SJC) ithe yavakalisa ukuba bayalwamkela olu ngenelelo noxa luluncinci nje. Lo mbutho yayingomnye owathi wanikezela ubungqina kwikhomishoni yaseKhayelitsha eyayijonga indlela amapolisa asebenza ngayo. Othethela iSJC uChumile Sali uthe esi sikhululo sizakwandisa ukubonakala kwamapolisa, ntoleyo ezakunqanda uburhalarhume. “Into esiyibethelelayo yeyokuba kufuneka isikhululo esisigxina eSite C kwaye esi sinamavili singajikelezi, sihlale ndawonye”, utshilo lo kaSali.
I-Elitsha iye yatyelela esi sikhululo ePlaza eSite C. Iye yathetha nabahlali ebebephuma kuso.
Vox pops
en